Die Tribunaal, wat in 2001 gevorm is, bestaan uit vyf lede (met inbegrip van die voorsitter en ondervoorsitter), wat aangestel is deur die LUR. Die lede van die Tribunaal is kenners van eiendomsbestuur, behuisingsontwikkeling en verbruikersake wat met huurbehuising verband hou . Die Tribunaal word deur die Ondersteuningskomponent van die Direktoraat Behuisingsvestiging bygestaan.

Die Tribunaal streef na die volgende:

• Om verhoudinge tussen eienaars en huurders in die huurbehuisingsektor vlot te laat verloop
• Om geskille by te lê wat as gevolg van onbillike praktyke ontstaan
• Om eienaars en huurders oor hul regte en verpligtinge ingevolge die Wet op Huurbehuising in te lig
• Om aanbevelings aan toepaslike belanghebbendes te doen

• Om stabiliteit in die huurbehuisingsektor in die Wes-Kaap te bevorder
• Om meganismes te skep om geskille in die huurbehuisingsektor te hanteer
• Om verhore om geskille op te los te fasiliteer, te ondersoek en te bemiddel, en om verhore te hou
Om eienaars en huurders in te lig oor hul regte en verpligtinge indien onbillike en wederregtelike praktyke voorkom

• Hoe dien 'n mens 'n klagte in?
• Wie kan 'n klagte indien?
• Wat is bemiddeling?
• Wat is 'n verhoor?
• Wat gebeur as die partye nie by die uitspraak van die Tribunaal hou nie?
• Kontakbesonderhede

Klagtes moet ingedien word op die klagtevorm wat by die Tribunaal verkry kan word.
'n Lêer sal vir die saak geopen word en 'n verwysingsnommer sal toegeken word.

Die Tribunaal sal 'n voorlopige ondersoek doen om vas te stel of die klagte verband hou met 'n geskil ten opsigte van 'n saak wat op 'n onbillike praktyk kan neerkom. Indien nodig, kan 'n inspekteur die betrokke eiendom ondersoek en 'n verslag opstel.

Die Tribunaal moet binne 30 dae na ontvangs van die klagte bepaal of die klagte verband hou met 'n geskil ten opsigte van 'n saak wat op 'n onbillike praktyk kan neerkom.

As die klagte nie met so 'n geskil verband hou nie, sal die klaer skriftelik daarvan in kennis gestel word. As die klagte wel met so 'n geskil verband hou, sal die Tribunaal probeer om die saak deur middel van informele of formele bemiddeling op te los. As die partye nie 'n ooreenkoms kan bereik nie, sal die saak verwys word vir 'n uitspraak tydens 'n formele verhoor.

Enige huurder of eienaar of groepe huurders of eienaars of belangegroep in die Provinsie Wes-Kaap kan klagtes by die Wes-Kaapse Huurbehuisingstribunaal indien.

Bemiddeling is 'n proses wat mense aanmoedig om geskille op te los deur op 'n informele, veilige en vertroulike manier met mekaar te praat. Opgeleide, ervare en onpartydige bemiddelaars help die partye om 'n ooreenkoms te bereik. Die partye besluit wat in die ooreenkoms moet staan, nie die bemiddelaars nie. 'n Ooreenkoms kan 'n bevel van die Tribunaal gemaak word.

'n Verhoor is 'n proses waardeur albei partye hul saak kan stel, met ondersteunende bewyse, sodat die Tribunaal 'n uitspraak kan lewer wat finaal en bindend is vir albei partye. Die uitspraak van die Tribunaal kan slegs deur die Hooggeregshof hersien word.

'n Uitspraak deur die Tribunaal word as 'n bevel van 'n Landdroshof beskou.

Enige persoon wat versuim om aan Artikel 16 te voldoen, sal skuldig wees aan 'n oortreding en kan by skuldigbevinding 'n boete of tronkstraf van nie meer as twee jaar nie, of beide, opgelê word, as jy byvoorbeeld:

• sonder voldoende rede versuim om 'n verhoor by te woon;
• weier om ingesweer te word;
• weier om enige dokument of voorwerp in jou besit voor te lê;
• die Tribunaal doelbewus mislei;
• doelbewus valse verklarings aflê.

Faks: 021 483 2060

Die Wes-Kaapse Huurbehuisingstribunaal
Privaat sak X9083, Kaapstad 8000