Daar is twee hoofsoorte belasting wat van 'n werknemer se salaris of loon afgetrek word:

• SIBW (Standaard inkomstebelasting op werknemers)
• LBS (Lopende betaalstelsel).

As jy meer as R27 000 per jaar verdien, betaal jy SIBW, wat elke week of maand van jou salaris afgetrek word. Jou werkgewer moet uitwerk hoeveel afgetrek moet word.

Een keer per jaar sal jou werkgewer vir jou 'n IRP5-belastingsertifikaat gee, wat die totale bedrag wat jy verdien het en die belasting wat afgetrek is, toon.

As jy meer as R60 000 per jaar verdien, moet jy 'n belastingopgawe invul en dit saam met jou IRP5-sertifikaat aan die SAID stuur.

Jy moet by die SAID registreer voordat jy 'n belastingopgawe invul. As jy reeds geregistreer is, sal jou belastingopgawevorm aan jou gepos word. Jy kan die vorms ook by jou naaste SAID-kantoor kry.

Jy kan ook jou belastingopgawe elektronies ontvang en indien deur die Suid-Afrikaanse Inkomstediens se e-Indienstelsel te gebruik. e-Indiening is 'n elektroniese diens vir belastingbetalers. Jy kan registreer vir e-Indiening as jy reeds geregistreer is as 'n belastingbetaler. Jy sal jou belasting-verwysingsnommer en ID-nommer nodig hê.

Saam met die vorms sal jy volledige aanwysings kry oor hoe om die belastingopgawe in te vul.

Wanneer jy jou opgawe indien, sal die SAID seker maak dat jy die regte bedrag belasting betaal het. As jy te veel belasting betaal het, sal jy 'n terugbetaling kry. As jy nie genoeg belasting betaal het nie, sal jy gevra word om die uitstaande bedrag te betaal. Jy kan ook 'n afskrif van die vorms by jou naaste SAID-kantoor kry.

Jy kan beboet word of tronk toe gestuur word as jy daaraan skuldig bevind word dat jy:

• belasting ontduik het (d.i. nie jou inkomstebelasting betaal het nie);
• nie 'n inkomstebelastingopgawe ingevul het nie;
• nie al jou inkomste op jou inkomstebelastingopgawe aangedui het nie.