In 'n verklaring ter ondersteuning van Nasionale borskankerbewustheidsmaand, sê Uys borskanker is een van die mees algemene vorme van kanker onder vroue in Suid-Afrika. "Baie vroue assosieer borskanker nog steeds met 'n doodsvonnis, maar in der waarheid is dit behandelbaar indien dit vroegtydig opgespoor word", sê Uys.
Ongeveer 90% van alle pasiënte oorleef 'n borskankerdiagnose wanneer dit in 'n vroeë stadium opgespoor word. "Dit het noodsaaklik geword om die Suid-Afrikaanse publiek in te lig oor die gevare van borskanker, veral oor die noodsaaklikheid van gereelde selfondersoek, gereelde mammogramme en die verskaffing van inligting oor vroeë diagnose en die beskikbare behandelingsopsies.
'n Bewustheidsmaand soos die een wat nou in Oktober in Suid-Afrika gehou word, weerspieël 'n landswye veldtog deur openbare en private gesondheidsektore om die Gesondheid van die Vrou en Borskanker, in die kollig te plaas.
Risikofaktore vir borskanker sluit onder meer in vroeë maandstonde, eerste swangerskappe by gevorderde ouderdom, 'n hoëvetdieet en sekere genetiese mutasies. Ander risikofaktore sluit ook tot 'n mindere mate hoë alkoholgebruik in asook die gebruik van sekere hormoonvervangings tydens menopouse.
Die risiko van borskanker onder Suid-Afrikaanse vroue tussen 0 en 74 jaar is 1 uit elke 31 vroue.
Uys sê gesondheidsdienste die wêreld oor het reeds ver gevorder in die bekamping van hierdie gevreesde siekte. "Behandeling is egter duur en elke nuwe fasiliteit wat hierdie provinsie kry om kanker te bekamp, word verwelkom. Ons het pas 'n nuwe CT-skandeerder by Groote Schuur Hospitaal aangekoop, en ons het ook 'n ekstra R1 miljoen bewillig vir die behandeling van hoofsaaklik borskanker."
"Ons doen dit omdat ons weet dat borskanker uiters behandelbaar is met die regte toerusting en fasiliteite. Ons in die Wes-Kaap is bevoorreg dat ons uitstekende kankerbehandelingsgeriewe dwarsdeur die provinsie het, maar die belangrikheid van vroeë opsporing deur gereelde ondersoeke verbeter kanse op oorlewing drasties, " sê Uys.
Ministry of Health
Western Cape
Kontak: Herman van der Westhuizen
Tel: 021 483 2627
