Die Provinsiale Parlement van die Wes-Kaap:

• Maak wette wat op die Wes-Kaap van toepassing is.
• Is 'n openbare forum vir debatte.
• Speel 'n belangrike rol in die toesighouding oor die Provinsiale Regering en om die Regering aanspreeklik te hou.
• Dra by tot nasionale kwessies deur deel te neem aan die bedrywighede van die Nasionale Raad van Provinsies
.

Elke provinsiale wetgewer kan 'n grondwet vir die spesifieke provinsie aanvaar as twee-derdes van die lede daartoe instem. 'n Provinsiale grondwet moet egter ooreenstem met die nasionale Grondwet soos deur die Grondwetlike Hof bepaal. Die Grondwet van die Wes-Kaapis in 1998 aanvaar.

Volgens die Grondwet, mag provinsies wetgewende en uitvoerende magte hê wat met die nasionale sfeer saamval oor, onder meer:

• landbou
• casino's, perdewedrenne, dobbelary en weddenskappe
• kultuursake
• onderwys op alle vlakke, behalwe universiteits- en technikon-opleiding
• die omgewing
• gesondheidsdienste
• behuising
• taalbeleid
• natuurbewaring
• polisiedienste
• provinsiale openbare media
• openbare vervoer
• streeksbeplanning en ontwikkeling
• padverkeerregulasies
• toerisme
• handel- en nywerheidbevordering
• tradisionele owerhede
• stedelike en plattelandse ontwikkeling
• voertuiglisensiëring
• maatskaplike dienste.

Provinsies het ook uitsluitlike magte oor onder meer die volgende sake:

• abattoirs
• ambulansdienste
• dranklisensies
• museums wat nie nasionale bewaringsplekke is nie
• provinsiale beplanning
• provinsiale kulturele sake
• provinsiale ontspanning en aktiwiteite
• provinsiale paaie en verkeer.

In die uitvoering van pligte wat deur die nasionale en Wes-Kaapse grondwette voorgeskryf word, verteenwoordig die Wes-Kaapse Parlement die mense van die provinsie en is dit 'n forum vir die bespreking van provinsiale kwessies.