Meer as 100 vroue en vrouegroepe vanoor die hele Wes-Kaap het oor die afgelope 6 jaar aan hierdie kompetisie deelgeneem. Die doel van die kompetisie is om vroue in landbou te bemagtig en hul sigbaarheid te verhoog. Dit dien terselfdertyd as instrument waardeur vroue se onontbeerlike bydrae tot die oorlog teen armoede erken kan word.
Die kompetisie vind eers op provinsiale vlak plaas, waarna provinsiale wenners op nasionale vlak meeding.
Belangstellendes kan in vier kategorieë inskryf of genomineer word, nl. top uitvoerder, top produsent vir nasionale markte, top produsent vir informele markte en top produsent vir huishoudelike gebruik.
1. Om vir die eerste kategorie in aanmerking te kom, moet ten minste 30% van die totale produksie vir uitvoermarkte geoormerk wees.Die kriterium vir die tweede kategorie bepaal dat meer as 30% van produkte vir nasionale markte beskibaar gestel moet word.
Kategorie drie is vir diegene wat aan informele markte verskaf en sodoende vir haar familie sorg. Die laaste kategorie is vir kandidate wat grootliks vir eie gebruik produseer, bv. groentetuine.
Behalwe vir goeie publisiteit en blootstelling vir die deelnemers, dien hulle as aansporing vir ander wat reeds in die landboubedryf betrokke is of dit as loopbaanopsie oorweeg. Groot pryse kan ook gewen word soos geborg deur ABSA, Total SA, Land Bank en Onderstepoort Biologiese Produkte (OBP).
Die sluitingsdatum vir inskrywings en nominasies vir die Wes-Kaapse kompetisie is 17 Junie 2005. Verdere navrae kan aan Gizelle van Wyk gerig word by 021 808 5022 of gizellevw@elsenburg.com.
