OoNondyebo bePhondo balawula izipaji zePhondo leNtshona Koloni. Banoxanduva lokuqinisekisa intsebenzo eyiyo kwizimali, uhlahlo lwabiwo-mali kwanolawulo lwekhonkco lwezibonelelo yaye kufuneka beze nengcebiso ngomgaqo-nkqubo wokulawulwa kwezimali nezibonelelo ukuxhasa urhulumente ekunikezeleni ngeziphumo zomgaqo-nkqubo wakhe kwanezimvo ngemiba ezinzileyo ekusetyenzisweni kwezibonelelo, ukunika igalelo ekuphuculweni kwemigangatho yokuphila kwanomgangatho weenkonzo ezifunwa ngabemi bephondo leNtshona Koloni.

• Ukwazisa
• Iimpepha ezibalulekileyo
• iKapa elihlumayo
• Imvelaphi Yembali
• Iinjongo Zeqhinga/misebenzi

OoNondyebo bePhondo, ngokwemisebenzi abayinikwe yiPublic Finance Management Act kwaneminye imithetho esondeleyo, bancedisa uMphathiswa/iCandelo loMphathiswa weZimali noPhuhliso loQoqosho ukuphuhlisa kwanokwenza banzi isiseko soqoqosho lweli Phondo.

Bakwenza oku ngoku-

• phucula intsebenziwano, ukulingana kwanentsebenzo eyiyo ekunikzelweni kweenkonzo


• nciphisa ukungalingani ngokwezoqoqosho nangezoluntu


• dala amathuba engqesho ngokusetyenziswa kwezimvo ezintsha


• nikezela umkhomba-ndlela ngokwezibonelelo kwanamathuba kwabo bawadinga kakhulu.
  

Ukuphumelela kwezi nzame kuya kukhokelela ekuphunyezweni kweenjongo ezichazayo zikarhulumente weNtshona Koloni zokuhlala ethembeni, ukunikezelwa kweenkonzo kwanesidima kumntu wonke kwanokuphunyezwa kombono iKapa elihlumayo.

UHlahlo Lwabiwo-mali lwePhondo luka-2004/2005

Isicwangciso-qhinga sooNondyebo bePhondo

Okuzuzwe ngooNondyebo bePhondo ukusukela ngo-1995

iKapa elihlumayo liqhinga lePhondo leNtshona Koloni lokukhawulelana neemfuno zabantu. Eyona nto ibalulekileyo kukwandisa inkxaso kwabo bahluphekileyo, ngelixa kukwaqinisekiswa ukuba abantu abaninzi banokuzuza ingeniso ngengqesho ehlawulayo.

Iinjongo zeKapa elihlumayo kukunciphisa intswela-ngqesho, intlupheko, kwanokungalingani ngokwemivuzo ngokuphuhlisa ukukhula koqoqosho kwanokuthathwa kwenxaxheba kwiphondo. Inkcitho ethe kratya kweli phondo ekuphuhlisweni kwezakhono norhwebo kwimisebenzi yezibonelelo ezinkulu iya kusetyenziswa ukutsala urhwebo lwabucala ukuphuhlisa uqoqosho. IPhondo eli liyakwayamisa eli qhinga lexesha elide kwinkxaso eyandisiweyo kwabo bahluphekileyo ngokuhlawulwa kweenkxaso-mali kwanokunikezelwa kweenkonzo ngendlela ephucukileyo.

Ulonyulo lokuqala kulawulo ngentando yesininzi eMzantsi Afrika ngo-1994 lwakhokelela kwindlela entsha yopolitiko eyadala aMaphondo alithoba amatsha. Kodwa kwakungekho balawuli kuloo maphondo ukuze beze neenguqu ezidingekayo. Kwafuneka sakhe iPhondo, futhi oyena ndoqo wolu lwakhiwo yayilisebe loonondyebo elisebenzayo - kungoko ke iSebe looNondyebo beNtshona Koloni lazalwa ngomhla wokuqala kwekaTshazimpunzi ku-1995 njengengxenye yeSebe elitsha leZimali neeNkonzo Zoshishino. Lalikwanikwe noxanduva lokuqinisekisa ukuba amasebe afana neli aya kudalwa kumaphondo uMntla Koloni neMpuma Koloni.

Ulawulo lukarhulumente wephondo luxhomekeke kakhulu ekusebenzeni ngendlela eyiyo kweSebe looNondyebo bePhondo. Ukuqinisekisa ukuba iNtshona Koloni yayisebenza ngendlela eyiyo nengachithi mali ininzi, eli Sebe lazibandakanya nenkqubo yokwakhiwa ngokutsha ukuzihlanganisa neSebe leSizwe looNondyebo.

Inkqubo yokwakhiwa ngokutsha yayidinga iinjongo zomgaqo-nkqubo kwanamaqhinga ekufuneka ekhangelwe ze kuqinisekiswe ukuba ayasebenza. Oku kwenziwa ngokudalwa kwamacandelo akhethekileyo, afana nePublic Finance and Accounting, Asset Management, Human Resource Management neResource Management.

Le nkqubo yagqitywa kwisiqingatha sokuqala sonyaka u-2003 ze yabandakanya la manqanaba:

• elokulungiselela kwanokuqinisekiswa kokusebenza kokuqala komthetho iPublic Finance Management Act (PFMA)


• elokunikezela ulawulo lwezimali kuwo onke amasebe


• elokulungiselela eli Phondo ukumelana nokunikezelwa kweenkonzo kwanokulingana kwiphondo eli.


• elokwakha iSebe looNondyebo bePhondo ukuphumeza indima yalo njengesebe elizimeleyo nelezifundiswa.


• elokusetyenziswa ngokupheleleyo komthetho iPublic Finance Management Act.

ISebe elisebenzayo neliphunyeziweyo ngoku kufuneka linikezele iinkonzo ezingcono kwiinjongo zeqhinga leSebe looNondyebo yaye liya kulinceda ukumelana nemiceli-mngeni yezoqoqosho loluntu lweli Phondo namanye amaphondo, oomaspala kwanabanye abantu okanye iinkampani ezinomdla kulo mba.

Iinjongo (zamaqhinga) zeSebe looNondyebo zezi:

• Ukuphuhlisa, ukuqinisekisa ukusebenza nokunyanzelisa ukusebenza kwezithethe zolawulo lwezimali kwanemigangatho eyiyo.


• Ukuqinisekisa indlela yonxibelelwano yangaphakathi neyangaphandle esebenzayo kwimiba yezimali.


• Ukwenza uphicotho lweencwadi lobuxhaka-xhaka bobugcisa kwanokwenza uphicotho lweencwadi ngokuvavanya ubungakanani bomngcipheko.


• Ukufumanisa nokuvavanya imida yezoqoqosho kwanezibophelelo zoqoqosho loluntu kwiphondo nakuqoqosho lwesizwe.


• Ukusebenzisa ngokugqibeleleyo izibonelelo zephondo, oko ke ibe kukuhlonela isisekelo kwaneemfuno eziluqilima zomthetho iPublic Finance Management Act, ka-1999.


• Ukwenza ukuncedwa ngezimali kwezibophelelo zephondo kwanokuqinisekiswa kokunikezelwa kwezibonelelo ukuphucula iimeko ezingancumisiyo zoqoqosho loluntu kweli Phondo ze, ngokwemigaqo yenkqubo yokusebenzisana koorhulumente ngezimali, linike igalelo eliluqilima ekwakhiweni kwezi mbono kwinqanaba lesizwe likarhulumente


• Ukuqinisekisa ukuqhutywa kweenkonzo zezimali kwanokunikezelwa kweengxelo okuza kubonisa ngokugcweleyo ubume ngokwezimali kwanentsebenzo kaRhulumente wePhondo.