iNkulumbuso uEbrahim Rasool kwakunye namalungu eKhabhinethi yePhondo baya kube bephehlelela iSicwangciso-qhinga sikaRhulumente wePhondo leNtshona Koloni Sokulwa Ukuxhatshazwa Kwamachiza kumcimbi oya kube ubanjelwe kwisikolo Samabanga Aphakamileyo saseTafelsig namhlanje ngentsimbi yeshumi elinesibini emini. Esi sicwangciso-qhinga sitsha sijolise ekusebenzeni ngendlela eqondise kwiingingqi ezithile, eziya kube zincediswa ekusebenzeni norhulumente nemibutho engekho phantsi kolawulo lukarhulumente ekushukuxeni ukuthengiswa, imfuno kwanemiba yokuxhatshazwa kwamachiza, miba leyo ifana nokubuyiselwa eluntwini kwamaxhoba ala machiza, ingakumbi aweTik.

iNkulumbuso nabaphathiswa aba baya kuzibandakanya kumaqela aya kuya kuluntu ekuhlaleni kwanasezikolweni [kwiSitalato iAssegaaibos, kwizitalato iBlaauberg neBakenskop] ukuya kushukuxa indlela entsha yokulwa nalo mkhwa, amajelo eendaba nawo avumelekile ukuba akhaphe futhi emva koku kuya kubanjwa iinkomfa yoonondaba ngeshumi lemizuzu phambi kwentsimbi yokuqala kwalapho esikolweni.

Oku ke kuya kulandelwa kukuvulwa ngokusesikweni komsebenzi obumba izikolo ekulweni lo mkhuba, msebenzi lowo uya kuba nesihloko esithi 'Race against Tik', namhlanje eJoseph Stone Auditorium eAthlone ngentsimbi yesibini emva kwemini. uMphathiswa uDugmore neNkulumbuso uRasool baya kuwuzimasa lo msebenzi futhi baya kube bezizithethi.

I-email: cwakeford@pgwc.gov.za

A Home for All ~ 'n Tuiste vir Almal ~ iKhaya Lethu Sonke

http://www.capegateway.gov.za