Minister Cobus Dowry het onlangs plantjies oorgehandig aan werknemers van die Riebeeck Wynkelder om hul groentetuinprojek 'n hupstootjie te gee.

Die wynkelder het 0,5ha onbenutte grond aan vier van hulle werknemers en hul gesinne vir hierdie doel beskikbaar gestel. Die groep beoog om basiese vars groente vir eie gebruik te produseer, maar ook vir informele bemarking om die projek meer volhoubaar te maak.

Op 'n latere stadium wil hulle ook 'n kwekery vestig om plantmateriaal aan die res van die gemeenskap te voorsien. Hul waterbron is afvalwater vanuit die kelder en wat in 'n opgaardam naby die tuin gestoor word.

Ter ondersteuning het die Wes-Kaapse Departement Landbou fondse beskikbaar gestel vir tuintoerusting, omheining, kunsmis en watertoerusting soos pompe en pyplyne. Die Departement bied ook opleiding en ondersteuning.