Kucingeleka ukuba kungoku nje zimalunga namashumi amathathu amawaka eendawo ezithengisa nekuselelwa kuzo utywala ezingenazimpephe-mvume zakuthengisa tywala ezisebenza apha eNtshona Koloni.

Inkampani iSouth African Breweries, njengengxenye yenkqubo yayo yeenguqu kunye nenkqubo yayo yophuhliso loqoqosho lwabamnyama ephangaleleyo, iphehlelele ngokusesikweni inyathelo UKUSA Licensing ngo-2004 njengentshukumo yokungenelela kulo mkhuba wokungasebenzi ngazimpepha-mvume kwanokukhuthaza abanini bezi ndawo zithengisa nekuselelwa kuzo utywala ukuba baziqhube ngokusemthethweni ze bawaphuhlise amashishini abo. Oku ke kulandela ekhondweni leenjongo zoMgaqo-nkqubo Osaqulunqwayo Wotywala weNtshona Koloni nowapapashwa ngo-2003.

I-SAB le inika abanini-mashishini abanqwenelayo ukufumana ze basebenze ngamaphepha-mvume okuthengisa utywala ngolwazi oluphangaleleyo kwiindibano zokubazisa apho baza kuthabatha inxaxheba kwiincoko ngenkqubo yokufumana amaphepha-mvume okuthengisa utywala kwaneemfuno zomthetho kubafaki-zicelo. Oku ke kubavumela ukuba benze izigqibo abazikisisileyo ukucinga ngazo phambi kokuba bakhethe uhlobo lwephepha-mvume umntu alifunayo ze bafumanise nokuba umntu uyilungele na. Inkqubo yokubafundisa ikwaquka neengxoxo ngeempembelelo zotywala eluntwini kwakunye nesidingo sokuqhuba ishishini eliluhlonelayo neliluphuhlisayo uluntu.

I-SAB le ikwanikezela nangenkonzo yeengcebiso neyokumangala simahla, apho umfaki-sicelo yena anoxanduva lokukhupha iintlawulo zomthetho kuphela, ezinento yokwenza nesi sicelo, ndawonye neentlawulo zeentengiso ekufuneka zikho.