Wonke umntu unelungelo lokuphila kwindawo esempilweni nekhuselekileyo eya kuqinisekisa ukuba basempilweni ngokwasemzimbeni ngokwasenyameni nangokwasengqondweni, kuquka nokunikezelwa kwamanzi aneleyo, ucoceko nokulahlwa kwenkukuma ndawonye nokhuseleko kuzo zonke iintlobo zeengozi zeengeozi zendalo engqongileyo, ukonakaliswa nokungcoliswa.

Ukuthatyathwa kwenxaxheba ekwenziweni kwezigiqibo

Wonke ummi unelungelo lokuthabatha inxaxheba ekuqulunqweni kwemigaqo-nkqubo yezempilo yaye wonke ubani unelungelo lokuthabatha inxaxheba kwimiba echaphazela impilo yomntu ngamnye.

Ukufikelela kwiinkonzo zononophelo lwempilo

Wonke ubani unelungelo lokufikelela kwiinkonzo zononophelo lwempilo eziquka:

1. ukufumana rhoqo inkonzo yononophelo lwempilo olungxamisekileyo evulelekileyo umntu enayo engenayo imali;
2. unyango neenkonzo zeengcebiso ekufuneka iigulana eso saziswe ngazo ukuqinisekisa ukuba siyaluqonda olu nyango okanye ezo ngcebiso kwaneziphumo zazo;

3. ukunikezelwa kweenkonzo ezizodwa kwiimeko zeentsana ezisandula kuzalwa, abantwana, amanina akhulelweyo, abantu abadala, abantu abakhubazekieyo, abantu abagula besezintlungwini abantu abaphila nentsholongwane kaGawulayo okanye izigulana zikaGawulayo;
4. ukunikezelwa kweengcebiso ngendlela engenamkhethe, izinyanzeliso okanye ubundlobongela kwimicimba efana nempilo yokubeleka, isifo somhlaza okanye intsholongwane kaGawulayo/uGawulayo;
5. inkonzo yononophelo lwempilo oludambisa iintlungu nolufikelelekayo ngokwezimali nolusebenzayo kumaxesha ezigulo ezinganyangekiyo okanye ezinobuzaza;
6. indlela yokusebenza ebonakalisa imbeko, isidima somntu, inyameko, uvelwano nonyamezelwano; kwakunye
7. nolwazi lwezempilo oluquka ukufikeleleka kweenkonzo zempilo nokuba zingasetyenziswa njani na ezi nkonzo yaye olo lwazi lona luya kufumaneka ngolwimi olwaziwa nolusetyenziswa sisigulana eso.

Ulwazi nge-inshorensi yempilo/ngenkqubo yonyango lwempilo

Ilungu le-inshorensi yempilo okanye lenkqubo yonyango lwempilo linelungelo lokufikelela kulwazi ngaloo inshorensi okanye loo nkqubo yonyango lwempilo ze acel' umngeni, apho kufuneka khona, kwizigqibo zaloo inshorensi yempilo okanye loo nkqubo yonyango lwempilo ezichaphazela ilungu elo.

Ukuzikhethela inkonzo yonyango lwempilo

Wonke ubani unelungelo lokuzikhethela inkampani amakangene kuyo ukuze afumane iinkonzo zonyango lwempilo okanye xa afuna inkonzo ethile yononophelo lwempilo yaye oko kuzikhethela akumelanga kukhabana nemigangatho yaloo nkonzo yaye kufuneka ilandele imigaqo ethile ebekelwe iindlela zokunikezelwa kwale nkonzo.

Kufuneka unyangwe ngumntu okanye inkampani eyaziwayo

Wonke ubani unelungelo lokumazi umntu onikezela loo nkonzo yononophelo lwempilo yaye kufuneka anyangwe ngabasebenzi benkonzo yononophelo lempilo abaziwayo.

Ukugcinwa kweenkcukacha zomntu nemfihlakalo

Iinkcukacha ngempilo yomntu othile, kuquka nolwazi olubandakanya unyango zingakhutshwa kuphela ngesivumelwano nesigulana eso, ngaphandle kokuba ke oko kudingeka ngokemigaqo yomhtetho othile okanye ngokomyalelo wenkundla.

Imvume

Wonke ubani unelungelo lokufumana ulwazi olupheleleyo noluchanekileyo ngesimo sempilo yakhe, imigaqo yogonyo, unyango olusacetywayo kwakunye neendleko zalo, ukuze umntu abe nokufikelela kwisigqibo esichaphazela nawuphi na kule miba ingentla apha.

Ukwala unyango

Umntu angala ukunyangwa yaye oko kwala uya kukutsho ngmlomo okanye kubhalwe phantsi kodwa ke oko kwala kufuneka kungabi kanti kubeka esichengeni impilo yabanye abantu.

Ukuthunyelwa kuluvo lwesibini

Wonke ubani unelungelo lokuthunyelwa kwenye iklinikhi ukuze afumane uluvo lwesibini xa athe wacela kuloo mntu okanye kwelo ziko lononophelo lwempilo alithandayo.

Ukuqhubekeka konyango

Akukho mntu uya kuyekwa nje egula anganyangwa ngumsebenzi wecandelo lononophelo lwempilo okanye yinkonzo yonyango ebiqale yaluthathela kuyo uxanduva ngeenjongo zokumnika unyango.

Khalaza ngeenkonzo zonyango lwempilo

Wonke ubani unelungelo lokufaka isikhalazo ngeenkonzo zononophelo lwempilo yaye kufuneka ezo zikhalazo ziphandwe futhi kufuneka afumane ingxelo epheleleyo ngolo phando.